Tunlaiin Mizoram ah Zu zawrh phal duh leh duhlo te`n thu an insawiin an inziah chhawk fo a, a pawimawh pawh a pawimawh reng a ni.

Pathian thu, Holy Bible hian Zu hi a do hle tih kan hmu thei a (ref Thufingte 20:1& 23:20-21&23:29-32&26:9). Chuvangin, Pathian nung Kohhran te tan chuan Zu chu dodal ve a ngai ta a ni. Sawi thui tehchiam pawh a ngai awm love. Zu hi mihring te hriselna atan chuan enge maw chen chu tangkai ve nalai a lo awm a ni thei e. Mahse, sawi mawi leh tawngkam thiamna hrim hrim avanga fak mawi chawp chiam tum  erawh hi chu Pathian nung be tute nun nen erawh a inkalh tlat thung a ni. Mihringte Dan in Zu hi a do emaw do lo emaw, Bible chuan “Dan awm hmain khawvelah sual a awm tawh si a(Rom 5:13)” a ti a, Pathian hian Zu hi a duhlo tih kan hre theuh tawha, Mihringte Dan siam chawp hmangin sual leh sual lo hi a teh bawk hek lova. Chuvangin , mihringte Dan siam chawpin enge sual a tih a enge a khap tih lam aiin ringtute chuan Pathian Dan danglam ve lo hi kan nunpui zawk a ngai ta tho tho a nih chu.

Engpawh chu lo nita se. Tunlaiin thenkhatin Zu khap an duhloh thu leh thenkhatin khap kan duh thu kan sawi a. Kan thukhel lai tak chu, ZU KHAP NGE THA A KHAP LOH tih a ni. Thlirna hrang hrang; kan hlawkpui theih natur leh chhiatpui theih natur te nen kan chhut kim hle a, a tha khawp mai. Mahse, Zu khap loh duhtute hian Zu chungchang ngawr ngawr sawi ta lo hian, zu do tlattu Kohhran te chu Uire lunga denhlum tum ang zia zangin mahni mifel ber ang maiin kan deng chawrh chawrh ngam nia. Kohhran ah pawh hian Sual Setana a rawn inrawlh chuan a siam tha tur chuan kan kawk sawk sawk ngam tur pawh a ni khawp mai. Mahse, kohhhran ho kan puhna te hi mahni, a puhtute ngei hi in enchiang hmasa i la. “Kohhranin Zu zawrh a duh lova, Zu a dodal a. Mahse, mipui sum eiru te thawhlawm chu a duh tho si a, eiru a do ngam chuang si lo,” ti te in mahni Setana hmanrua ah kan inbarh lut ta emaw tih mai turin kohhran te hi kan tawng kan tawng ta a. Kan thusawiin a ken chu, kohhran hian zu a dodal zel a nih chuan kohhran hi i sawichhe ve zel i la, i boycott hial teh ang u tihna ang vel a ni. Kohhran hian hlepruk leh eiruk hi a dodal tak zet a, a innghahna Bible ah ngei kan hmu thei a ni. Chiangtaka hlepru leh eiru hriat an niha kohhranin a lo zilhhau ngamlo a nih chuan dem tak zet tur chu a ni khawp mai. Mahse, kohhranin zu zawrh a duh loh avanga hlepru te pawisa leh thawhlawm lo hnial phallo ang em em a kan sawi hnawm zel duh hi chu Pathian chinfel turah dah mai ila a hahdam thlak ber mai awm e. Eiru te hi chiangtaka kan hria a nih chuan kohhran chauhin an chungah hma a la tur a ni chuang lova, mahni hming tilang kherlo pawhin Anti-Corruption Bureau (ACB) leh Vigilance Department ah te pawh mimal pawhin kan thlenru thei a, duh leh kohhran kan lipse fo ang hian misual kan hriatchian chu chanchinbu ah an sualna chipchiar takin thailang ngam law law ila. “Kohhran upa eiru pawh kohhranin zilh duh si lovin Zu zawrh a dodal” kan tih fo te hi, kohhran upa zawng zawng tih hmingchhiat vek tum lovin, kohhran upa eiru kan hriat te chu chiang fek fawkin mipui hma ah pholang ngam i la  maw le.

Zu hi sual ah chuan a langsar ber pawl a ni. A in thinte an ruih thin a, rui chunga pawi an khawih thin a, vantlang nun an tih raltit thin avangin mi zawng zawngin a sualna chu awlsam taka, zep hleih theih loha kan hmuh vek a ni. Zu chu tu zawrh nge a in tih pawh zawtin finfiah kherlo mah ila, a in tu ngei kha midang mit hmuhah a ruih tho tho thin avangin a zu in chu a pho lang tho tho thin. Eiru leh hlepru te hian a ruk a ralin an ti a, tamtak chu an nupui leh pasal te pawhin an eiruk an hriatpuilo hial a ni. Zu in chu  an ruih thin miau avangin an nupui leh pasal te bakah khawtlangin kan hriatpui deuh vek. An eiru ngei a niang, a hlawh nen an khawsak nawm dan a in millo kan tih te pawh hi  an eiru leh hlepru lai tak kut man a awm si loh chuan rinhlelh thil thu a kohhranin lo phuar leh lo do chiam ngawt chu ringtu puitling tak tan chuan tih chi a ni lovin; pawi thui tak khawih theihna a ni ve zawk mah a,  fiahna awm lova kan lo dodal leh dan chep a te kha an ni pawhin an duh leh tum lawk ang ni miah lovin Setana chhuah ka lamah kan nawr liam lui ve zawk thei a ni. Kohhran hi awm ta lose, hlemhletna hi tun ai hian Zoramah hian a nasain a lang pawhin a inlar nasa ngam mai lo`ng maw ? Kohhran chakna leh kohhran chak lem lohna Zu zuar tamna khua te hi han tehkhin dun ila, khawi khua nge ralmuanga changkang zawk ? Biak In a inkhawm fo thin chuan kan hre vek awm e. Biak In a thusawi tam ber te hi hlemhletna, eirukna, ruihhlo, etc dodalna thu a ni thin a sin. Kohhran bel chiang duh si lova thu fahrah te te hmanga Kohhran hi hlemhletna zirtirtu leh dodal ngamlo ang zia zanga zirtirna thehdarh tum hi a ti duh pawhin an tih hmain nasa takin Pathian rawn phawt thin teh ang u, kan tisual thui lutuk hlauh dah ange. Kan thupui lai tak, Zu zawrh phal thatna leh that lohna chu kan tawngkam thiam ang angin chiang leh felfai takin sawi ila, a tawk fu lo maw ? Vairam leh ramdang, Lal Isua ringlotu te ramah pawh zu rui chunga motor khalh an khap bur hlawm a, India state thenkhatah pawh Zu zawrh te hi an khap ve bur tho si chuan Lal Isua din Mizoram Kohhran te chuan engvangin nge ZU hi kan dodal loh tehlul ang le ?

PC.LALNGHINGLOVA
CHHINGCHHIP
CAMP: HYDERABAD

Copyright 2007. All Rights Reserved.