Swine Flu  hi chanchin buah leh chanchin thar puangtute pawh hian an tial hle tawh a. Nitin hian Swine Flu vangin mi thi zat leh vei thar zat hi kan hre deuh reng a ni. Mizoram pawhin Swine Flu enkawlna tur damdawi, Tamiflu a neih tawh thu te leh,  Falkawn Referal Hospital-ah khum 10 lai buatsaih anih tawh thute kan lo chhiar a. Nasatakin sorkar pawhin hma a la reng niin a lang a. Swine Flu hi a thawm leh a ri va a nat ang hu hian a tla na em aw tih hi ziaktu thenkhatte chuan an tar lang nual a. July 15, 2009 a World Reportah chuan Swine Flu vanga thi 429 an awm a, tin, flu pangngai a thi 13,000 tih report a ni. Hei hi January 2009 to July 15, 2009 atanga chhiar kha a ni. A vei an tih thenkhatte hi chu an dam leh thuai mai a, kan han tar lan ang hian Swine Flu vanga thi ai hian Flu satliah (regular flu) vanga thi hi an tam daih zawk a ni. August 13, 2009 Yahoo Sport News chhuakah khan Los Angeles Galaxy Soccer team forward, thiam tak mai leh, khel mawi si, Landon Donavan pawh Swine Flu positive tiin an rawn tar lang a. Amah, tlangval  Donavan chuan, “Flu pangngai ka vei aiin a mi deh dan a nasa lo mah zawkin ka hria e,” a ti an ti ve tlat a ni. A hma ni August ni 12 hian Donavan hian Mexico National Team nen World Cup Qualifying Game-ah minits 90 tawp a khel bawk. Tin, tun Saturday, August 15 khan Galaxy team leh Seattle team nen an inkhelhnaah hian Donavan hian half time atangin a khel ve nghe nghe a. Amah Donavan chuan a tir atang pawh khan lo khel ve ila ka theih tho ka ring, chaklohna ka nei pawhin ka inhre lo a ti a ni.  

Swine Flu laka invenna vaccine an tihte pawh hian a veng tak tak em? Tin, mihring tan a hlauhawm thei em? Kum 1976 vel khan he vaccine hi nasa taka puandarh a ni a. Mi tamtakin inven nan an inchiu tir a. Mahse khami tum khan an inchiu vangin mi tamtakin zeng hri an vei phaha, thihna hial tawkte pawh an awm a ni. Khang tuartute ho khan sorkhar an khinna pawisa chu $1.3 billions a tling a ni. Tun tum pawh hian sorkar chuan ‘New Swine Flu Vaccine’ an rawn vawrh chhuak mek a. Daktawr thenkhat chuan he vaccine an rawn tihchhuah thar hian a veng tak tak a ngem tih leh mihring tan a hlauhawm thei ang em ti a beng sika lo ngaihtuah thin te pawh an awm nual a ni. He kan article tum ber chu he natna hlauhawm tak a lang, lak atanga inveng tur hian natna do theihna (immune system) chak tak kan neih a pawimawh em em a ni. Tichuan mitinin kan  tih theih theuh kan han sawi duh a ni.

Swine Flu Emaw Flu Reng Reng Laka I Him Theih Nan Kawng Mawl Te  Te Zawm Turte:

 

   1. Thisena Vitamin D level tha tawk in neih reng a tul ang. Mi thiamte lo hriat tawhna atangin Vitamin D tlakchhamna hian natna infections chi hrang hrang a kai chhuak thei a, flu tan pawh hian a tangkai a ni. Vitamin D tangkaina chu Women’s Ministry articles-ah te pawh khan kan han sawi tawh thin. A hmuhna tha ber chu Pathian thilsiam ropui tak, mitin tan man lova hmuh theih, ni eng atangin a ni.

   2. Thil thlum abikin rial chini (sugar) ei tlem rawh. Thlum hian natna venghimtu, (immune system) hi nasa taking a tichaklo thei a ni. Immune System chak tak kan neih chuan Swine Flu leh natna dang reng reng do let theihna kan nei ang. In tur thenkhat thei tuiah te leh soda chi hrang hrangah hian thlum a tam em em a ni.

   3. Hah chawlhna tha tawk nei rawh. Zanahah I mut that tawk lova I taksa kha chau reng renga a awm chuan, natna min rawn beitute do zawh a harsa thin. Tin, hahchawlh dan dangdai deuh, eng sakhua pawh bia la Chawlhnia chawl a Pathian Biakina kalin inkhawm hi hahchawlhna tha leh hriselna atan pawh a tangkai a ni. Pathian faka hlim taka zaihona te hian kan thisena natna hrik dotute thenkhata a chhuah tam tir thei a ni, tih hi mithiam ten an fiah tawh thin.

   4. Harsatna (stress) hi mitin chungah a thleng thei a ni. Harsatnate kan tawha kan tuar thiam dan leh dan lo hian kan hriselna atan nasa takin kawngro a hril thei.

   5. Exercise hian thisen kal vel a tichaka chu chuan kan thisena awm natna vengtute khan taksa bung hrang hrang natna hrik lo awm tur kha nasa takin a veng thei. Chubakah, exercise hian taksa bung hrang hrangah boruak tha (oxygen) a ti tam a, oxygen hi natna hrik tamtak, cancer cell tan pawh an ral hlauhawm tak a ni.

   6. Kut hi fai taka sil fo a pawimawh em em. Kut failo atang hian natna hrik, virus leh bacteria te hi kan kaah emaw hnarah emaw awl takin a kai theih. Chuvangin, kut hi silfai fo a tul a ni.

   7. Natural Antibiotics thatak, purun var hi ei tam a tha. Nitina chawa ei tel a tha hle ang. Purun var chhut sawm hi natna hrik hrang hrang virus leh bacteria leh protozoa laka taksa veng him turin a tangkai a ni. Chubakah lung hrisel nan leh zunthlum atan te pawh tangkaina tha tak a nei a ni.

Chhiartu duhtakte, heng natna khirh leh hlauhawm tak tak, Swine Flu leh HIV/Aids, cancers leh Bird Flu an tihte leh natna dang reng reng laka inveng him tur hian Hriselna Dan Kawng Riat (8), Mawl Te Te, chipchiar taka kan han sawi fo tawh thin, mitin tihtheih si kan han tar lang nawn leh duh a ni. Chungte chu:

 
   1. Tui Thianghlim: Nitin tui no ruk atanga no riat in hian natna za a (75%0 a veng thei tih hi mithiamte lo chhut leh lo hriat tawhna a ni. Tui in tawk leh tawk loh hriatna thaber chu zun hi a fim ral tur a ni.

   2. Ni eng: Ni eng atanga Vitamin D awm hi hriselna tur leh natna hrang hrang, zunthlum, lungna, cancer leh infections natna hrang hrang Swine Flu leh HIV atan a tangkai a ni tih hi mi thiam ten an fiah belh zel a ni. Khawvel ram hrang hranga Ni eng an hmuh tlemna ramah zunthlum leh cancer hrang hrang vei an tam bik tih hmuh a ni. Tin, Vitamin D tangkaina hi science lam hian an hmuh belh zel bawk a ni.

   3. Boruak Thianghlim (oxygen):  He Pathian thilthlawnpek ropui tak, a tel lova minit tlemte pawh kan nun theih loh si hi hmang tangkai ila. Kan taksaa tam tawk a awm theih nan exercise te tih fo a tha.

   4. Insumtheihna (Temperance): Ruihtheih lam thil leh ei leh inah te, engkima insum thei nih hi Pathian engkimtithei hnena innghat tlat mite tan chuan a theihin a harsa lo. Phillipi 4:13 a sawi, “Mi tichaktu Krista zarah chuan engkim ka ti thei,” a tih hi kan rin tlat chuan kan hlawh tling ngei ang.

   5. Chaw Tha (Nutrition: Motor khawl siamtu chuan a khawl siam chu a hre chiang em em a, tluang taka tlan thei turin a duha. Chutiang bawkin Siamtu Pathian hian, a mihring siamte chu hrisel taka  an awm theihna turin an eitur Genesis 1:29ah khan a lo sawi a. “Ngai teh u, lei chung zawng zawng a thlai chi nei awm tinreng, thing chi nei rah awmnate chu ka pe che u a ni; in chaw atan a ni ang,”tiin. Pathianin mihringte eitura a lo ruatah te hian thisen dawt hnawhtu leh lungna, lungphu chawl thihna leh thisen sang siamtu bul ber, cholesterol an tlem em em a. Tin, Vitamins leh antioxidant, cancer laka min vengtu pawimawh tak an ngah em em bawk a ni. Thlai leh thei tam tawk ei hi a pawimawh tak meuh a ni.

   6. Insawizawi (Exercise): A chunga kan han sawi tak ang hian exercise hi boruak thianghlim tam tawk min pe turin leh thisen kal vel tichak turin an pawimawh em em. Motor khawl ding reng a tuiekin a hman tlak loh mai thin ang hian kan taksa khawl mak taka Pathian min siam pawh hi a tuiekin a hman tlakloh thuai thei.
   7. Hawchawlhna (Rest): A chunga kan han sawi tawh a.

   8. Pathiana Lawmna leh Rinna Nghah: Rinna hian Pathian nen min zawm tlatin, inhnai takin min awm tir thin. Amaha rinna   innghah tlatna hian nun kawng a ti tluangin engkima hlim leh lungawi thei mi nihna a thlen ngei ngei thin. Hei hi hriselna leh natna do theihna hnuk chelhtu bul ber chu a ni. Zawlnei Ellen G. White chuan, “Lawmna leh fakna thinlung aia taksa leh thlarau tihrisel thei zawk eng dang mah a awm lo,” a ti. He lawmna leh fakna thinlung hian, Pathian hmangaihna leh a thatna ngaihhlutna ropui tak min neihtira, Pathianna lawmna tuikhur kang ngailo, Van Lal thutthleng atanga luang chhuak ngei min neih tir thei tlat. He hlimna leh lawmna hian taksa pum a rawn fan chhuak a, kan thisen kal vel a tichak thin. Thisen kal tha chuan taksa bung hrang hranga mamawh chaw tha (nutrients) a phur darh zung zung a, chumi rual chuan taksa bawlhlawh natna a chang mai thei kha a phur bo zung zung  bawk thin. Tichuan, kan thisena natna hrik dotute lymphocytes, T-cells te a rawn chhuah tam tir a, Biblein, “Thinlung hlim hi damdawi tha tak a ni,” a lo tih hi a dik zia a lo chiang zual thin.

Chanchinbuah te kan chhiar danin, Vairengteah leh Lengpui Airportah te Swine Flu Screening an nei tawh tihte kan lo chhiara. A tha e, mahse thil hautak leh hun  tam tak sen ngai a ni. Tuna kan han sawi tak hrisel ngei ngeina tura kawng mawl te te kawng riat te  hi kan Women’s Ministry mailah te chipchiar takin kan rawn chhuah tawh thin a. Heng kawng mawl te te tluka Swine Flu leh natna dang do tura kan immune system tichak thei tu hi a awm lovang. Rinawm taka lo zawmtu chuan hlawhtlina tha tak an nei thin tih hi fiah a ni fo tawh a ni. Mitinin pawisa seng lova  tih theih a ni. Pathianin a thilsiam tamtaka kan damna tur a lo dah tam zia te hi chhut nawn fo ila. Ni eng  atanga kan hmuh Vitamin D damdawi, infection hrang hrang Swine Flu do nan tangkai tak a lo dah dan te hi a ropuiin a mak a ni. Lalpa chu fakin awm rawh se.

In Thawhpui,

Health Ministry, First Mizo SDA Church of America

 

Copyright 2007. All Rights Reserved.