Birthday cake chu bawlhlo chi hrang hrang infinkhawmin a siam chhuah a ni.  Bawlhlo chung berah chuan cream a awm thin a ni. Cream chuan a chhunga bawlhlo dang zawng zawng chu mawi takin a tuam ta thin a. Hetiang bawk hian ram kalsiam chu a chhungah thil chi tinreng - mipui, kohhran, khawtlang pawl, etc ten an siam a ni. A chung berah chuan rorelna khawl (politic hmanga dinchhuah) a awm thin a ni. Chu rorelna khawl chu Democracy /mipuite sorkar tiin kan sawi thin a. Abraham Lincoln chuan “by the people and for the people”a ti a. Hemi awmzia chu, “mipui te hamthatna tur atan mipuite rorelna” tihna mai a ni. Democracy-ah chuan mipui an thu ber a, chu an thuneihna hmang chuan an aiawha hmala turin hruaitu an thlang thin a. Kan aiawha hma la tur an nih avang hian thuneihna pawh nasa tak kan pe nghal thin a ni.

 
Mipui hmanga roreltu chu mipuite thlan a nih ngawt avang hian  ram kalphung chu a kalhkim ringawt thei mai bik lova. Kalphung dik tak nei tur chuan thil pawimawh zet zet mai ala awm ta cheu; pakhatna chu mipui, hruaitu tur tha leh dik thlangchhuak thiam khawpa fingharh kan mamawh a, pahnihnaah chuan mipui te hamthatna turte leh kalphung mumal tak a awm theih nana kalphung leh dan mumal tak duang chhuak thiam hruaitu dik leh tha kan mamawh a ni. Mipui an finharh loh chuan, hruaitu tha an chhuak thei lova, hruaitu dik lo chuan mipui harsatna bawk a thlen leh mai thin a ni.

Tin, hemi bakah mi dik a ni. Mipui dik tak leh hruaitu tha hringchhuaktu chu chhungril nun atanga mi dik, corrupt rilru reng reng pu hauh lo, dik tak kalpui thei leh kalpui ngam hi a pawimawh a ni. Kan Kristianna atangin khawvela ethics ropui ber hretu kan ni. Chu, zirtirna chu kan ram politics a chiah hneh thei reng reng si lo hi chhut chian a hun ta hle.

Tichuan, Mizoramah eng ber a hi nge kan harsatna ni ta le?. Mipui kan fingharh lova, kan mamawh dik tak hruaitu dik leh tha an piang chhuak hleithei lo a ni. Hruaitu tha kan hlawhchham a, chhungril nuna mi corrupt an tam a ni. Chu chuan kan ram kalphung (system) a luhchilh a, kan ram a thang muang a ni. Ka’n hruaitu zingah a tha leh dik tak a mipui kaihruai thiam kan tlachham a, tunlai khawvel atan model dik ni tawh lo an tam a ni.

 

A nih engatinge hruaitu tha chu kan thlan chhuah theih si loh? Pakhatnaah chuan kan nun chhungril leh kan sukthlek hi a dik lo a ni. Mi tam ber chuan mahni emaw chhungkua emaw chhungkhat laina hnai leh thiante hlawkna tur hi kan dah lian ber thin. He rilru sukthlek atang hian kan ram hruaitute chu kan thlang thin a ni. Kan chhung hnai deuh chu kan vote mai a ni lawm ni? Kan hlawkpui theih tur ngei kan thiante chu kan vote mai loh takah..? Vai ho ze tha lo zet ang maiin kan party a nih chuan vawkpui pawh nise, kan vote tho ang tih rilru pu thin kan ni. Kan thian pakhat supplier hnuaia thawk mek thusawi ka la hriat reng chu “contractor leh suplier lian tak tak te hian Mizoram tan mitha pawh kan hre lutuk tlat, mahse, kan tana mitha lo tur chu engvangin nge kan thlan teh lul ang”. Hei tak hi Marx-a’n khawthlang rama capitalist class ho a sawiselna chiah chu a ni. Mi tlemte leh thenkhat ten an hmakhua thatna tur chauhin ram kalphung an her danglam tir thin a. Chu inbumna, Marxa’n false consciousness a tih hmang chuan mipui tam zawk te chu hmin an ni a, tichuan ram pum chu mi tlem zawkte bumna thangah chuan an awk thin a ni. Mizo mipui tamtak hian mi dik leh mi tha pawh kan hria, mahse a tak ram thleng tur chuan kan sukthlek hian engemaw “thil dang” hian a kaihruai tlat thung si thin niin alang. Engemaw thil tang bet tlat (contradiction) leh kalhkim thei hauh lo hi kan ramah a awm ta a ni.

Pahnihnaah chuan ram hruaitu thlanchhuahna hmun political party kalphung hi siam danglam tul chu a ni. Tuna kan kalphungah hian mipui duhthlanna hi political party chhungah chauh a ni. Mipui ten kan duhzawng han vawrchhuahna emaw kan nei hranpa lova. Tu emaw political party-a inhmang deuh kha, party mi leh sa ten an rawn vawrhchhuak a. An party mi zingah khan thalai tawngkam takin an confi ngam lo a nih phei chuan tu emaw vantlang mi rin deuh kha inthlanna dingturin an sawm leh mai anga. Kan duh emaw duh lo emaw political party siam chhuah candidate chu kan lo vote leh mai dawn a ni lawm ni? Khawiah tak chuan nge mipui duhdan chu a awm chuan le? Political party sukthlek a dik hma chuan engvangin hruaitu tha kan neih tehlul ang. A siamchhuahna khawl a that miau loh chuan, ram dinhmun chu chhul chak lo hrinchhuah nau sawngnawi ang chauh a ni kumkhua mai dawn a ni.

Mi corrupt chuan kalphung (system) dik lo (corrupt) a hringchhuak a. Kawng dangin sawi leh dawn ila, ram kalphung chu computer ang a ni. Computer hnathawh tibuaitu ber chu Virus a ni. Virus chuan computer chu a luhchilh tawh chuan, computer chu a thawk tha thei lova. A rei tial tial a, virus (worms, Trojan etc) chu an inthlah pung tial tial a. A tawpah computer chu a thawk dik thei ta lo a ni. He Virus venna tur hian computer mithiamte chuan Anti-Virus an siamchhuak a. He anti-Virus hmang hian computer chu thenfai a ni thin a ni. Mahse, virus chu a tam lutuk tawh chuan, anti-virus a thawk tha thei tawh  lova, computer pum chu thuah fai (format) a ngai hial tawh mai thin. He dinhmun hi mi tamtak ngaihdan, a bikin thalai zingah hralh kal em em mek chu a ni. Kan ram hi siam danglam theih a nih tawh loh chuan, computer chhunga hnathawhtirtu ho software ho chu format vek a. Software thar an awm a tul an ti mek a ni. Heti a nih chuan, rualute hian ram kalsiam tur hian thangthar mamawh khawp leh mipui mamawh khawp kan thawk lo a ni mai em?

 

Chumi atan kawng dang a awm tawh ngang lo ti a ngai an awm bawk. Thuneihna atanga hniam zawka tlak hi mihring zia reng a ni ngai lo. Kan ram kalphung system hi vuahthiah vek a, a bul atang tan that leh sawi mawi pawl an awm a. Engti chiahin nge kan vuahthiah vek ang a, engtin nge bul chu kan tan ang tih erawh lu ti hai tham zet a ni. Ngaihdan lo vawrh hmasatu zingah chuan hriat lar ber tur chu Marx-a hi a ni. Khawthlang ram dinhmunah nasa takin ngaihtuahna alo seng tawh thin. Mi chungnung leh politics fawng luah bet hneh em emtu- capitalist class-te chu nuaibo mai a harsat em em a, eng tik khawtikah mah mipui tam zawk thatna tur chuan an inhnuk dawk dawn si lova, a tawpkhawkah tharum hmanga sual mai a lo rawt hial reng a ni. Tunlai hian hemi awn lam lek lek a zawnga thuziak leh revolution hial thleng thei tura ngai an awm ta nawk mai.  Hei em hi zawng thil rinawm tak pawh a ni lem lo, insawithaihna thil mai a ni.

“A nei apiang pek belchhah an ni ang a, nei lo te chu an neih sa thlenga chhuhsak an ni dawn” tih kha a takin kan ramah a thleng mek a ni. Hausa ten building luahsen loh leh ram luah sen loh an nei a, an lei belh zel bawk a. Khawkar inkalpawhna kawng bul huan/lo ram reng reng chu mihausa zawk ten an pumhmawm mek tawh niin an sawi fo thin. Hemi rual chiah hian rethei inluah lum tur nei lo an pung mek zel a. Hei aia la buaithlak zawk ta fo chu hausa leh a thei zawk ten mahni nun nawm zawk nan mi rethei chanai ngawih ngawih an lo lakkhalh duh ta fo hi a ni. Kristian ramah hian eirukna tenawm ber hi a thleng fo thin a ni. Mirethei sum laksak hi mirethei hnuk chhah sakna a ni.  Sorkar sum mai pawh ni lo, mirethei sum lo suasam duh MIZO hming invuah ve si hi engzat nge awm tawh le? Mizoram ram zim teah, sum ka neih avang ringawt a tiam chin awm lek lova, ram lei chiam chiam hi retheite harsatna a thlen mai lo maw? Hei hi Pathian malsawmna kan puh fo dawn em? Retheite retheihna belchhah tura hausakna kan inchhekkhawl belh zel hi Pathian duhdan a ni chiah ang maw? Pathian hming chhalin kan eiru ngam fo hian kan nunchhungril mawih zia a tarlang chiang hle a ni. Khawnge “sem sem dam, eibil thi thi” kha ni ta le?

Engkim tobul chu chhungrila nun a ni. Nun dik leh tha zawm kawngah kan ram hi a hlawhchham mek si a ni. Tunhma pi leh pute thutha an nun kaihruaitu hrang hrangte kha tunlai khawvel ziarangin a lem zo ta em ni le? Tunlai khawvel ziarang hrang hrang, modernity, globalization, Media etc zawng zawng hi changkanna vek a ni lo tih kan hre thiam lo lui a, kan bawh ruih ruih mek si a ni. Kan pawm thiam tak tak theih loh chu - nun kaihhruai tura mawhphurna neitu lian tak Kohhran hi a hlawhchham a ni. Tunlai Mizoram kalphungah hian chiang takin a lang thei a ni. Kan ram population tam ber chu (Mizo chin) Kohhran huang chhung mi deuh vek kan ni. Mahse, Kohhran atanga thutha leh zirtirna kan dawn leh kan nunphung hi a inang thlawt lova. Kan ram hi a dam lo a ni. Kohhran hian zoram hmelhmang danglamna khawp zirtirna a pai tawh lo em ni le? Zoram Kohhran chu a institution level-ah a thang duang a, moral/ethics lamah kan tlahniam mek si a ni mai lo maw? Daih rei tak tak si lo, Camping leh revival tih hut hut ai hian rinawmna lamah te hian tan kan la ve thung zawk dawn em niang? Rawngbawlna leh intuaitharna camping pawh hi kan buatsaih tan tawh teh e. Mahse, Bible in “an rahah in hria ang”a tih hi inenfiahna tha tak a ni. Zepthu awm suh, kan rawngbawlna rahchhuah hmelhmang zoram chu heti mai hi a ni.
 

Khawtlang ho ziarang pawnlanga entawn nasa viau e ti lo hian, kan ram rorelna kawnga mawhphurtu lian ber politician ten Vai politician-te culture duhawm lo zet zet an entawn tlat thin hi mak ka ti mai mai thin. Kan Kan sakhaw vawnlai zirtirna hi engtikah nge politic-ah kan sengluh thiam ve ang le? A hnam anga kan tangkhawm thiam ta lo lutuk te hi aw..ngaihtuah tham a ni. Tuna Mizoram huam chinah hian Sailo ho ten hun rei tak ro an lo rel thin a ni. Sailo ho hi an mahni an inngeih teh chiam thin lo nain an raldo te lakah chuan an tangrual thiam em em thin. Hman deuh khan, India ram hi British Lalnu in India ram rawn tlawh a tum a, India ram mithiam leh politician-te chuan Independent sual laia British General pakhat Dyera’n Amritsar hmuna mipui pawisawi lo a kah chiam avanga ngaihdam dil turin an lo phut a. Khami tum khan India mithiamte, politician leh mipui an tangrual viau a ni. Mizoram rambuai lai khan India rama thleng ngai zen zen lo, Aizawlah Bomb thlak a ni. Indira Gandhi (L) vua leh vang la dam mek ten Sonia Gandhi-te hian Mizo mipui hnenah ngaihdam dil ve se tih sawirik a ni. Hetiang issue pawimawh hnam dang ten an dah pawimawh em em thin chu Mizote tan pawh political party chauh ni lo, hnam anga tanrualna chi a nih teh lul nen a hnu lawkah Politics inchirhtheh nan hman zui a ni. Mipuite tan thlawp zuina chi reng a ni tawh lo. Hman deuh bawk khan kan rama political party pakhat chanchin chu Media pakhatin thil chiang tak awm hmain an chanchin dikhlel deuhin a tarlang a. He political party hian an han complaint a, he media hian ngaihdam a dil vat ta nghe nghe a. Hemi hnu lawkah political party dang pakhat chuan media-te thlavang hi an rawn hauh leh chiam mai zu nia. Party thenkhat chuan court thutlukna chiangkuang tak pawh, “a ni love” tiin press release an siam chhunzawm mai thei bawk. Thudik tak hmanga politic khelh hi kan awn lova, khingpuite sawichhiat ringawt mai hi kan politic khelh dan niin alang. Khingpuite hnathawh dik lo re-construct sak zawng ni lem si lo, thurchhuah ngawr ngawr tumna ringawt zawng a kan kal zel a nih chuan, engtikah mah ram rorelna changkang kan nei lovang. Mipui ten thudik leh dik lo thliarthiam theih a ni tawh lova, kan hawi mawl hu ringawt zel tawh mai a ni. Engtikah hian nge maw bul kan tan ve dawn le? Pianphunga rual pawl fu fu, chhungril lama mawih ru zet si hi kan tam a ni.

Kan ram dinhmun hi ngaihtuah chian poh leh, khawiah hian nge damdawi a awm tak le ti a rum vawng vawng a awl thin. Gilead thinghnai damdawi hi khawiah nge a awm le? Hetiang renga kan kal zel a nih chuan Rokunga te suangtuahna raltiang ram kan thlen hma hian kan ram hi kan eida vek hman ang. Tunah hian mipui ten hruaitu hming vuah tlak kan nei meuh lo a ni e. Ram leh hnam pumin kan rinngam khawp hruaitu lo pianchhuah ni hi dawhthei takin i nghak phawt mai teh ang u!


                        
           
          
 
 

Copyright 2007. All Rights Reserved.