Khawvel a University lar ber leh upa ber pawl Cambridge University ti a kan lo hriat lar 'University of Cambridge' ah pawh Mizo zirlai kan nei ve ta reng mai. Mizo zirlai Cambridge University a zir mek Nl.Dr.Lalnuntluangi Chawngthu hi Dr.C.Lalzawna(L) leh Pi Lalthankimi te fanu niin Aizawl Kananveng ah chhungkua in an awm a ni. Nl. Tluangi hi zirna lam ah chuan a Pa hnathawh na hmun a nih avangin Delhi ah zirna bul a tan a Mizoram ah chhungkua in an lo chhuak a Pawl-2 atanga pawl-12 thleng Kendriya Vidyalaya (Central School), Thuampui Aizawl ah kum 2000 thleng khan a lut a. Pawl-12 a zir chhuah hnu hian Mizoram Sawrkarin Higher & Technical entrance a buatsaih ah a pumpui ah 3-na a inziak tlingin MBBS zirturin Delhi ah bawk a let leh a ni. Lady Hardinge Medical College, New Delhi ah July,2000 atanga 2006 thleng Doctor a zir a, internship te a zawh hnu hian Emmanuel Hospital Association hnuaiah Prem Sewa Hospital, Utraula, Uttar Pradesh-ah thla 2 vel a thawh hnuin Aizawl ah mahni Inlum a awm pahin Nazareth Nursing Home ah rei vak lo a thawk leh a ni. Zirna sang zawk bei leh tumin Delhi ah a chhuk leh a 2008 kum bul lam khan Sapram (U.K) ah chhukin University of Wales Institute Cardiff(UWIC) ah Master of Business Administration(MBA) a zir chhunzawm ta a ni. MBA a zirlai hian Health lampang a thlur bing a, Health Informatics ah independent study a ti nghe nghe a ni. MBA a zirzawh hian zir chhunzawm leh turin Visa a buaipui nghal a, University of Cambridge ah dilna a thehluh hnu admission ti turin thlan a ni a tunah hian Master of Philosophy(M.Phil) in Development Studies, Department of Land Economy ah a zir mek a ni. Mizo Nula chhuanawm Dr.Tluangi Chawngthu Biangbiakna tawi te kan nei a: Admin: Sapram a lehkhazir tur a kal tum te tan engtin nge hmalak dan tur? Dr.Tluangi: British Council website ah hian resources a awm teuh a-scholarships te, interviews te ngai thung a U.K a zir duh tan chuan en deuh reng chi a ni. Tin, kan hriatlar Cambridge University leh Oxford University angah te hian an website a scholarship dil theih te an tarchhuak reng a, nakum lama lut duh tan chuan kumin december hma hian apply ngei ngei a ngai thung a ni. Saprama lehkhazir tum tan chuan heng website kal tlang hian administrators te hi email direct a thawn pawp a mai tur a ni a, tlema hmahmawhthlak leh hriatthiam loh ah te chuan telephone pawh a biak pawh theih reng an ni a, an fel thin khawp mai, ka tawn tawh chinah chuan tumah biak pawp hreawmin an awm ngai lo.
Admin: Sapram a zirna sen so leh awmman chungchang? Dr.Tluangi: U.K ah hian Zir man chu fees leh awmman zawng zawng nen chuan kum khatah £20000 chu chu India pawisa in Rs.15,41,007.3 vel chu sen angai thin. Admin: In zirna hmuna zirlai te nunphunga entawn tlak ni a i hriat? Dr.Tluangi: Zirlai leh extracurricular activities an balance thiam hi an entawn tlak ka ti thin. Achhan chu hna zawnna ah hian zirlaia ti tha chauh hi an en lova employability han tih khan skills leh abilities chi hrang hrang te an en thin a Mizo ah chuan zaipawla tel te, hnatlan tih te pawh hi anni chuan an ngaisang ang. Mahse a in balance tawk hriat erawh a tha khawp mai. University of Cambridge atang hian nikum khan Mizo Tlangval Laldinkima Sailo chuan M.Phil in Development Studies hi a lo zir chhuak tawh bawk a ni. Kan Mizo nula leh tlangval entawn tlak tak tak te hi Hyderabadmizo ten chhuanawm kan tiin an hma lam hun lo kal zel turah duhsakna sang ber kan hlan e.
Copyright 2007. All Rights Reserved.  |
News/Archive 
Nimin Dt.5 September 2010 (Pathianni) atang khan Hyderabad Mizo Association sum tuak nan Lucky Draw ...