Andhra Pradesh state thendarh a state thar siam ngiat tu Telengana mipui ten state chhung hmun hrang hrang ah leh abikin state capital Hyderabad-ah nunphung an ti buai hle.Telengana state siam ngiat vanga thil huaihawt na leh inhmuhkhawmna hmunpui bera an neih Osmania University campus, Hyderabad-ah pawh he thu ziah lai thleng hian nunphung a la pangngai hlei thei lo.

 

A.P state chhunga district 10 te lachhuak a a hranga Telengana state siam ngiat avangin Telangana Rashtra Samithi (TRS) hotupa K.Chandrasekhara Rao in nikum 2009, 26 November a Khaman Jail atanga thihchilh huama chaw a nghei avangin Central Sawrkar lu a ti hai hle a nih kha. Central sawrkar in Telengana state siam a tiam tak avangin 9 December 2009 khan K.Chandrasekhara Rao pawh chuan ni 11 zet chaw nghei pawh chu a chawlhsan ta a ni. TRS member leh Telengana mipui ten central sawrkar thutluk na hi beiseina sang tak leh phur taka an thlir laiin an beisei anga thil a kal tluan tak lutuk loh avangin tunlai thleng hian Andhra Pradesh chhung leh state capital Hyderabad ah chuan 'Telengana State' chungchang hian nitin chanchinthar a la luah chho ta zel a ni.

Tunhnai a Telengana State siam ngiat vanga Hyderabad khawpui a thil thleng langsar zual te:

#14 Feb 2010(Pathianni) zan khan Osmania University zirlaiten Telengana Region chhunga MLA 15 awmten banna an theh luh avang leh MLA dang te pawh bang ve nghal tur a phut in kawngzawh an nei a. Police te nen nasa taka in hmachhawnin zirlai 20 in hliam an tuar a, hliam tuar zingah hian zirlai hmeichhia te pawh an tel a ni. Zirlai te mai bak ah hian thuthar thehdarh tu thenkhat leh Police te pawh an intibuai a ni. He buaina avang hian Osmania Campus chhungah Andhra Police te mai bakah buaina chhuak tur veng turin Para Military Force te inkulh tir an ni.

#20 February 2010(Inrinni) khan State Assembly ah Budget Session neih a ni a, CM leh Finance minister ni bawk K.Rosaiah in Annual Budget(2010-11)  a pharh dawn a. Chumi denchhen chuan Telengana Students Joint Action Committee ten 'Chalo Assembly rally' an huaihawt. He rally avang hian Hyderabad khawpui chhung a bikin Osmania University leh Assembly House inkar kawngpui te khar  a ni a, Police ten kawngpui dung leh kawngpeng thuam mipui punkhawm theihna remchang lai apiang pingin thir hlingnei te zam a ni a. Khawpui chhung hmun tin ah Police te in ral ringin hmanraw chi hrang hrang hmangin an thawk chhuak a, flyover brigde tam zawk khar an ni a, Bus leh motor service dan pawh siam danglam vek a ni. Osmania University ah zirlai rally nei turte an pungkhawm a, Assembly House thlenga kawngzawh an tum chu Police te nen nasa takin an in hmachhawn leh a Tlangval pakhat in khawnvartui in leihin inhal hlum tumin zirlai kawngzawh lo dangtu Police te ava pan phei a, hliam nasa tak tuarin damdawiin ah dahluh nghal a ni a. A hnuah a taksa a hliam tuar lovin a boral ta nghe nghe a ni.

#21 February 2010(Pathianni) khan Osmania University campus ah Telengana zirlai ten an thian Siripuram Yadagiri  a hma ni a khawnvartui hmanga inhal hlum ta sunnan mombati chhi in Arts College leh NCC gate inkar ah rally an nei. Buaina lian tham engmah chhuak lovin rally hi neih a ni a. Telengana Students JAC President P.Ravi chuan Telengana state siam anih hma chuan an hma lakna an kalpui reng dawn tih leh buaina chhuak lo zawnga nasa taka hmalak erawh an tum zel thu  a sawi.

Telengana avanga buaina hian engtik ah tak tawp hun nei ang maw? tih hi tunlai Hyderabad mipui te ti ti ber chu a ni!

 

Telengana State siam ngiat chungchang a tobul leh chanchin bengvarthlak tak tak kan Admin zing a mi Tv.Malsawmdawngliana Lailung ziah Mizotawngin hetah hian chhiar theih e: Lu ti hai Telengana!

 

Copyright 2007. All Rights Reserved.